यदक्षरपरिमाणं तच्छन्दः अर्थात् जसमा वर्ण या अक्षरको सङ्ख्या निर्धारित हुन्छ, त्यसलाई छन्द भनिन्छ । छन्द भनेको लयविशेषको नाम हो । वेदका छ अङ्गहरूमध्ये छन्दलाई वेदको पाउको रूपमा स्वीकार गरिएको छ । वेदका प्रत्येक मन्त्रहरू छन्दमा नै रहेका छन् । छन्दको ज्ञानविना ती मन्त्रहरूले बताउन खोजेको अर्थलाई बुझ्न सकिँदैन एवम् मन्त्र गुनगुनाउन पनि गाह्रो हुन्छ । वैदिक साहित्यको मौलिक आधार नै छन्द हो। हाम्रा सबै शास्त्रहरू छन्दमा नै रचिएका छन् । शास्त्रहरूको अर्थ केलाउनका लागि छन्दले ठुलो भूमिका खेलेको हुन्छ ।

वैदिक सनातन धर्म र संस्कृत शिक्षाको अध्ययन, अनुसन्धान, संरक्षण, प्रवर्धन र प्रचारप्रसार गरी वैदिक वाङ्मय एवं संस्कृतभित्र निहित ज्ञानविज्ञानको महत्त्व दर्शाउनु वाञ्छनीय छ । विश्वमा संस्कृतको महत्त्व बढिरहेको परिप्रेक्ष्यमा अध्ययन, अनुसन्धान, विश्लेषण तथा खुला, पारदर्शी, न्यायपूर्ण, आत्मनिर्भर र समतामूलक समाज निर्माण गर्ने कार्यमा आवश्यक अध्ययन-अनुसन्धान गर्दै वर्तमान र भावी पुस्ताका नेपाली एवं विश्वसमुदायलाई समेत गुठीको उद्देश्य पूर्तिका लागि प्रोत्साहित र अभिप्रेरित गर्न नागरिकस्तरमा एक अध्ययन, अनुसन्धान र जागरणमूलक गुठी स्थापना गर्न वाञ्छनीय भएकाले डा. स्वामी केशवानन्द गिरिज्यूको सत्सङ्कल्पमा वैदिक अनुसन्धान गुठी स्थापना गरिएको हो ।